Innlent

„Vona að þú sofir vel“

Jakob Bjarnar skrifar
Helga Seljan bárust skilaboð frá reikningi sem áður hefur verið notaður til að hafa í hótunum við hann. Hann segir þetta langt í frá þægilegt.
Helga Seljan bárust skilaboð frá reikningi sem áður hefur verið notaður til að hafa í hótunum við hann. Hann segir þetta langt í frá þægilegt. vísir

„Vona að þú sofir vel“. Þessi skilaboð bárust Helga Seljan blaðamanni á Messenger Facebook í kjölfar Kveiks-þáttar sem fjallaði um njósnir sem fyrirtækið PPP ehf. stóð fyrir að undirlagi Björgólfs Thors Björgólfssonar fjárfestis 2012.

Skilaboðin bárust frá reikningi eiginkonu Jóns Óttars Ólafssonar, sem hafði við annan mann staðið í njósnunum líkt og fram kemur í þættinum. Helgi segir að honum hafi áður borist skilaboð frá þessum sama reikningi til Helga. Það mál tengdist Samherja. Kjarninn, sem síðar rann saman við Stundina og varð að Heimildinni, greindi frá þeim en eiginkonan neitaði því að hafa sent skilaboðin. 

Jón Óttar gekkst síðar við því að hafa sent skilaboðin og bað Helga afsökunar.

Yfirboðarar Helga á Ríkisútvarpinu, svo sem Stefán Eiríksson útvarpsstjóri, sem er fyrrverandi lögreglustjóri telur einsýnt að Jón Óttar sem fyrrverandi lögreglumaður viti mæta vel hvernig á að hóta undir rós. Þar á bæ er þessum skilaboðum ekki tekið létt að sögn Helga.

Á RÚV eru skilaboðin túlkuð sem hótun

„Nei, það gerir það enginn. Í ljósi sögunnar þá vita menn að bæði er þetta eitthvað sem hefur komið frá honum áður. Og það liggur líka fyrir hver tilgangurinn átti að vera á þeim tíma. Hann hefur gengist við því,“ segir Helgi í samtali við Vísi.

„Menn geta auðvitað leikið sér að því, briddsspilarar uppi í Lögbergi, að þetta sé orðalag sem eigi ekki að káfa uppá neinn. En við vitum alveg að hann hefur gert þetta áður í þeim tilgangi. Ef hann hefur ekki skynsemi í að átta sig á því mættu þeir sem nú eru að borga reikninginn, hvort sem það er Björgólfur Thor eða Birgir Már (Ragnarsson) eða einhver annar, stíga inn og lána honum smá dómgreind.“

Helgi segir að ekki standi til að kæra þessi skilaboð. Hann vilji fyrst og fremst að þetta hætti. 

„Ég nenni ekki að láta þessar gusur ganga yfir mig öllu lengur.“

Hefur áður beðið Helga afsökunar á svipuðum skilaboðum

Viðbrögðin við þættinum hafa verið mikil þó Helgi telji að Vilhjálmur Bjarnason fjárfestir og aðrir sem komu við sögu hafi fundist mest fyrir þeim.

„Við höfum ekki náð tali af þeim sem þarna er fjallað um. Það var kannski fyrirsjáanlegt.“

Hér má sjá skjáskot af skilaboðunum eins og þau bárust Helga frá reikningi eiginkonu Jóns Óttars. Áður höfðu skilaboð frá þeim sama reikningi, eða 2020 borist Helga en þá í tengslum við Samherjamálið.

Kveiksfólk hefur ekki náð að ræða málið við Jón Óttar en eins og Helgi bendir á voru þessi viðbrögð, skilaboð frá Facebook-reikningi konu hans, það sem frá honum kom. Þessi tilteknu skilaboð komu að kvöldi miðvikudags en þátturinn var sýndur á þriðjudagskvöldi.

„Menn geta alveg lagt sinn skilning í skilaboðin en í ljósi þess að það eru ekki mörg ár síðan ég og Ingi Freyr Vilhjálmsson, fengum einmitt skilaboð frá þessum reikningi, frá Jóni Óttari, þá eru þetta hótanir. Hann gekkst við þeim þá og baðst afsökunar.“

Helgi segir að kona Jóns hafi brugðist við fréttum af skilaboðum, að hún hafi ekki skrifað þau þá þó skilaboðin bærust frá síðu hennar.

„Þetta er náttúrlega sent til að hreyfa við fólki. Mér finnst það ekki í boði. Ef að hann, ég gef mér að þetta hafi verið hann en ekki konan hans, hefur eitthvað við þessa umfjöllun að athuga hefur hann allar leiðir til að tjá sig um hana. Ef hann vill ekki tala við mig, þá mína kollega.“

Þóra gengst við því að hafa sent skilaboðin

Helgi segir að það þýði ekkert að kæra þetta og honum finnst ekki sem hann eigi að þurfa þess. Hann vill bara höfða til Jóns Óttars, eða þeirra sem gera hann út, að þetta sé ekki leiðin. 

En í ljósi sögunnar, fer um þig ískaldur hrollur?

„Til þess er þetta gert og auðvitað stendur manni ekki á sama. Þetta er ekki þægilegt. En á móti, það er þægilegt að afgreiða þetta sem eitthvað kjánalegt. 

Helgi Seljan segir ekki í boði að fá skilaboð sem hæglega megi túlka sem hótun fyrir það eitt að fjalla um viðkvæm málefni.vísir/vilhelm

Ég ber virðingu fyrir því og sýni því skilning að það er ekkert þægilegt að verða umfjöllunarefni um svona hluti alveg sama þó hægt sé að halda því fram að full ástæða hafi verið að gera það. Við verðum samt að halda haus, það verður að díla við þetta öðruvísi en með svona æfingum.“

Rétt eins og þau hjá RÚV hefur Vísi ekki gengið neitt að ná í Jón Óttar til að spyrja hann út í þessi skilaboð og málið almennt. Hins vegar náði Vísir stuttlega í Þóru Steinunni Pétursdóttur, eiginkonu Jóns Óttars og eiganda téðs Facebook-reiknings. Hún sagðist hafa sent Helga skilaboðin og óþarft væri að blanda Jóni Óttari í málið. Ekki væri hægt að túlka skilaboðin sem hótun, hún óski þess frá sínum dýpstu hjartarótum að Helgi sofi vært allar nætur. En Helgi megi túlka þetta eins og hann vill. Þá sagði Þóra að blaðamanni væri ekki heimilt að hafa neitt eftir sér og sleit samtalinu.


Tengdar fréttir

Kæran setti lífið úr skorðum

Jón Óttar Ólafsson, fyrrverandi rannsóknarlögreglumaður hjá sérstökum saksóknara, segir að viðhorf sín til rannsókna efnahagsbrotamála séu gerbreytt eftir að hann sjálfur þurfti að svara fyrir kæru frá embættinu vegna brota á trúnaði í starfi.

Málið áfall fyrir embættið

Ólafur Þór Hauksson, héraðssaksóknari og fyrrverandi sérstakur saksóknari, segir að njósnamálið sem Kveikur fjallaði um í gærkvöldi sé áfall fyrir saksóknaraembættið. Það sem lýst sé í þættinum gangi gegn öllum gildum og siðferði innan lögreglunnar.




Fleiri fréttir

Sjá meira


×