Skotin flakka milli Enoks og Birgittu: „Settu franskarnar í pokann“

Sjó- og athafnamaðurinn Enok Vatnar Jónsson og Birgitta Líf Björnsdóttir, áhrifavaldur, LXS skvísa og markaðsstjóri World Class á Íslandi voru saman í um það bil þrjú ár og eignuðust saman son í febrúar í fyrra.

Í síðasta mánuði var svo greint frá því að slitnað hefði upp úr sambandi þeirra.

Nýtur lífsins í Suður-Frakklandi

Birgitta er stödd í Cannes í Frakklandi og nýtur lífsins á frönsku ríverunni í góðum vinkvennahópi.

Í myndbandi á Tiktok-reikningi Ástrósar Traustadóttur sést Birgitta ganga ein við undirleik lagsins Let me love you með Ariana Grande, á meðan hún horfir til allra átta og glottir. Vinkonur hennar dást að henni á meðan og taka myndir.

Texti lagsins sem heyrist í myndbandinu er nokkurn veginn eftirfarandi:

„Ég var að hætta með kærastanum mínum. Núna er ég hérna einhleyp, og veit ekki alveg hvað bíður mín. En ég er ekkert að missa mig, ætla slaka á og fylgjast með.“

Enok lætur ekki kyrrt liggja og skrifar athugasemd við myndbandið: „Settu franskarnar í pokann“.

Um er að ræða slanguryrði sem notað er til að niðurlægja einhvern, gefa í skyn að þú hafir engan áhuga á að hlusta á það sem einhver hefur að segja.

Aðstæðurnar sem vísað er til eru þegar starfsmaður á skyndibitastað ætlar að fara spjalla um heima og geima við viðskiptavin, en sá sem er að versla segir starfsmanninum einfaldlega að þegja og sinna starfi sínu.

Merking athugasemdarinnar er því einhvern veginn þessi: „Hættu þessu, ég vil ekkert með þig hafa,“ en ljóst er að honum finnst myndbandið vera sneið eða skot í áttina að sér.

Athugasemdin þykir nokkuð kuldaleg og niðrandi ef marka má viðbrögðin.

„Þetta er konan sem gekk með son þinn í 9 mánuði. Hvernig líður þér í glerhúsinu þínu?“ segir ein sem svarar honum.

„Elska hvað þú fattar ekki hversu lítið þú ert að gera úr sjálfum þér akkurat núna - absolute cinema,“ segir önnur.

Önnur ritar athugasemd við myndbandið sem er ótengd ummælum Enoks, en hún segir: „Alvöru fumble hjá kallinum,“ og ljóst er af þeim ummælum að fleiri en Enok sjálfur túlka myndbandið sem sneið í garð Enoks.