Handbolti

Gísli Þor­geir meiddist enn á ný á öxl

Runólfur Trausti Þórhallsson skrifar
Gísli Þorgeir Kristjánsson fór meiddur af velli snemma leiks.
Gísli Þorgeir Kristjánsson fór meiddur af velli snemma leiks. Getty/Frank Molter

Gísli Þorgeir Kristjánsson, landsliðsmaður í handbolta og leikmaður Magdeburg í Þýskalandi, fór meiddur af velli þegar Magdeburg lagði Lemgo í efstu deild þýska handboltans. Um er að ræða meiðsli á vinstri öxl. Er það ekki í fyrsta sinn sem Gísli Þorgeir meiðist á öxl.

Handbolti.is greindi frá. Þar segir að Gísli Þorgeir hafi meiðst eftir aðeins þriggja mínútna leik og óttast sé að meiðslin séu alvarleg. Þjálfari liðsins, Bennet Wiegert, er sagður hafa hulið andlit sitt þegar í ljós kom að Gísli Þorgeir þyrfti að yfirgefa völlinn vegna meiðsla.

Íslenski landsliðsmaðurinn var að brjótast í gegnum vörn Lemgo þegar stuggað var við honum, hann missti jafnvægið og lenti illa á vinstri öxlinni. Sem stendur er ekki vitað hversu slæm meiðslin eru.

Magdeburg vann leikinn með tveggja marka mun, lokatölur 31-29. Ómar Ingi Magnússon skoraði þrjú mörk.

Með sigrinum fer Magdeburg tímabundið í toppsætið en Füchse Berlin getur náð því á ný síðar í dag.




Fleiri fréttir

Sjá meira


×