Fótbolti

Fiorentina ó­á­kveðið og lið í Meistara­deildinni hafa á­huga á Alberti

Ágúst Orri Arnarson skrifar
Albert gæti orðið leikmaður Fiorentina, Genoa eða farið einhvert allt annað.
Albert gæti orðið leikmaður Fiorentina, Genoa eða farið einhvert allt annað. Giuseppe Maffia/NurPhoto via Getty Images

Framtíð Alberts Guðmundssonar er óráðin, lánssamningur hans við Fiorentina er að renna út og félagið hefur ekki tekið ákvörðun um að kaupa hann frá Genoa, sem hefur fundið fyrir áhuga á leikmanninum frá liðum í Meistaradeildinni.

„Fiorentina er með kauprétt sem félagið getur nýtt, en þarf ekki að nýta. Við höfum fundið fyrir áhuga frá félögum í Meistaradeildinni, en við þurfum bara að bíða og sjá hvað gerist. Það er ekki heldur útilokað að Albert snúi hingað aftur“ sagði Marco Ottolini, yfirmaður íþróttamála hjá Genoa, við ítalska dagblaðið Secolo XIX.

Fiorentina greiddi átta milljónir evra fyrir að fá Albert að láni á þessu tímabili. Kaupréttur félagsins kveður svo á um sautján milljónir evra og þá gætu bæst við þrjár milljónir evra í aukagreiðslur.

Lánssamningurinn rennur út í lok júní og Fiorentina þarf að taka ákvörðun fyrir mánaðamót. Félagið er hins vegar þjálfaralaust eins og er, Raffaele Palladino hætti störfum eftir tímabilið og Fiorentina vill væntanlega ganga frá ráðningu áður en ákvörðun er tekin um Albert.

Albert og félagar í Fiorentina tryggðu sér sjötta sætið og Sambandsdeild á næsta tímabili. Image Photo Agency/Getty Images

Albert glímdi við lærismeiðsli á tímabilinu en tók þátt í 24 deildarleikjum fyrir Fiorentina og skoraði sex mörk. Liðið endaði í sjötta sæti deildarinnar og tryggði sér aftur þáttökurétt í Sambandsdeildinni, eftir að hafa dottið út í undanúrslitunum í ár.

Albert er í landsliðshópi Íslands sem mætir Skotlandi í Glasgow 6. júní og Norður-Írlandi í Belfast fjórum dögum seinna.




Fleiri fréttir

Sjá meira


×