Netið sló út í mið­borginni og Hlíðunum

Bilunin kom upp á slaginu 19 í miðlægum búnaði Mílu á Rauðarárstíg, að sögn Atla Stefáns Yngvasonar, samskiptastjóra Mílu. Net sló því út allt frá Lækjargötu og að Túnum.

„Það virðist vera bilun í einu stýrisspjaldi sem er að valda þessu,“ segir Atli. Hann tekur fram að viðgerð sé langt á veg komin og að megnið af nettengingum sé komið aftur í gang

Bilunin hafði áhrif á fyrirtækjaþjónustu, þar á meðal útsendingar Sýnar og sjónvarp Símans á svæðinu, en sú þjónusta er að mestu komin aftur í lag, að sögn Atla.

Áhrifa er einnig að gæta á farsímasendum á svæðinu, samkvæmt tilkynningu frá Mílu, og eru eftirfarandi sendar enn þá úti: Katrínartún, Ásholt 2, Landsbankinn, Hátún, Borgartún 18, Borgartún 32 og Seðlabankinn.