Alþjóðadómari hraunar yfir tríóið: „Þrjár kol­rangar á­kvarðanir“

Mönnum var heitt í hamsi eftir leik gærkvöldsins og sjaldan hefur rólyndismaðurinn Craig Pedersen sést eins æstur og hann var eftir leik. Ísland hafði unnið sig inn í leikinn eftir að hafa verið 16 stigum undir og komust yfir á kafla í fjórða leikhluta.

Synd var að ekki væri hægt að útkljá leikinn á gólfinu þar sem síðustu mínútur leiksins fóru nánast einvörðungu fram á vítalínunni. Pólverjar fengu dóm eftir dóm sér í hag.

Þeir Arnar Guðjónsson og Finnur Freyr Stefánsson fóru þá mikinn í umfjöllun RÚV um dómgæsluna. Atvikin sem útkljáðu leikinn, auk umræðu þeirra félaga, má sjá í spilaranum.

„Þetta var góður leikur tveggja liða en þriðja liðið mætti ekki til leiks í dag,“ sagði Kristinn Pálsson meðal annars á blaðamannafundi eftir leik. Dómararnir flúðu þá af vettvangi og neituðu að þakka leikmönnum Íslands fyrir leikinn. Líkt og þeir vissu upp á sig sökina.

Todd Warnick, alþjóðadómari til margra ára á vegum FIBA og dómaraþjálfari, greindi ákvarðanir dómaratríósins á lokakaflanum fyrir síðuna BasketNews. Hann fær orðið:

1. Ólöglegt screen á Tryggva

„Fyrsta atvikið kemur upp þegar 2:39 eru eftir af leiknum og staðan var jöfn eftir að Ísland hafði unnið upp 12 stiga forskot sem hafði verið snemma í fjórða leikhlutanum. Ranglega var dæmd ólögleg blokkering á Tryggva Hlinason eftir að Mateusz Ponitka negldi á hann,“

„Tryggvi gerði allt rétt, gaf honum tíma og fjarlægð, en Ponitka fór harkalega í jörðina – það þýðir samt ekki að dæma eigi brot. Gott en hart screen hjá Tryggva og dómarinn bregst við viðbrögðum (eða látalátum) andstæðingsins frekar en raunverulega hvort sóknarleikmaðurinn sé löglegur eða ekki.“

2. Óíþróttamannsleg villa á Elvar Má

„Næsta mjög svo vandasama atvik kom upp þegar 1:44 voru eftir í fjórða leikhlutanum. Kamil Laczynski fellur harkalega til jarðar og leikur er stöðvaður vegna meiðsla. Eftir pásu á leiknum í um tvær og hálfa mínútu dettur dómurunum skyndilega í hug að skoða „ofbeldishneigða hegðun“,“

„Það sem sést á skjánum er augljóslega Laczynski og Elvar Friðriksson að læsast saman, þeir tosa í hvorn annan, og þegar það losnar hendir Laczynski sér yfir á öxlina á sér,“

„Dómarateymið skoðar atvikið og metur sem svo að Elvar hendi honum í jörðina, sem er einfaldlega kolrangt. Þetta eru tveir gæjar sem læsast saman, einn fellur í jörðina. Þetta er kallað „körfubolti“.“

„Það mátti heyra hikið í röddum dómaranna þegar þessi dómur féll. Þessi dómur tók alls sjö mínútur áður en leikur hélt áfram með tveimur vítaskotum og boltinn aftur til Póllands vegna óíþróttamannslegrar villu sem hefði aldrei nokkurn tíma átt að dæma,“

3. Draugavilla Ægis

„Strax í næstu sókn, þegar 1:33 eru eftir, fer Jordan Loyd í þriggja stiga skot. Ægir Steinarsson verst honum, en dæmd á hann villa og önnur tæknileg villa fyrir mótmæli. „

„Endursýningar sýna að þetta er draugadómur – það er engin snerting á nokkurn hátt.“

„Þessar þrjár augljóslega röngu ákvaðaranir höfðu gríðarleg áhrif á möguleika Íslands á sigri.“

„Ein önnur athugasemd: Lettinn Andris Aunkrogers hefur dæmt í öllum þremur leikjum Póllands. Hvers vegna að setja dómarann ​​í svona stöðu?“