Ísland er úr leik á EM í Frakklandi eftir tap gegn heimamönnum í 8-liða úrslitum á Stade de France í kvöld, 5-2.
„Það er ekkert spes að fá fimm mörk á sig ef maður er aftasti varnarmaður,“ sagði Ragnar eftir leikinn í kvöld. „Þeir tóku okkur í bakaríið í fyrri hálfleik. Það er óhætt að segja það. Þeir voru góðir og við lélegir.“
„Svo fór allt inn hjá þeim. Það er ekki alltaf sem að það gerist. Það var líka smá óheppni í þessu.“
Hann segir að íslenska liðið hafi gert mistök í kvöld. Mistök sem Ísland hafi ekki endilega gert áður á mótinu.
„Það kemur alltaf að því að maður gerir mistök og það gerðist í dag. Í fyrsta markinu var Giroud að hlaupa frá mér yfir til Kára og hann er í rangstöðinni þá. Ég fell til baka og elti hann og geri hann þá réttstæðan,“ sagði Ragnar.
„Ég er að reyna að segja Kára að falla til baka líka en það heyrist auðvitað ekkert inni á þessum velli. Ég spilaði hann því réttstæðan en elti hann ekki alla leið. Svona hefur örugglega komið fyrir áður hjá okkur en það skilaði ekki marki og því man enginn eftir því.“
„En það kemur að því að menn gera mistök og nú gerði ég mistök í þessu marki.“
Hann segist stoltur af Íslandi og íslenskum áhorfendum. „Þetta er í fyrsta sinn á ævinni þar sem maður skíttapar en er samt með stolt í hjarta. Stolt íslenskt hjarta. Við erum stoltir af áhofendunum sem eru ómetanlegir.“
„Maður hefur þroskast aðeins og veit að maður er góður. En það er samt erfitt að fá fimm mörk á sig þegar maður er hafsent.“
Hann segist vonast til þess að frammistaða hans á EM, sem hefur verið lofuð mjög, sé nóg til að koma honum í sterkari deild.
„Ég er alltaf að horfa upp á við. Ég tel að ég geti spilað í miklu betri deild en þeirri rússnesku, sem er þó mjög góð.“
„England hefur alltaf verið draumurinn minn. Ég er búinn að gera allt sem ég get - gefa allt mitt í þetta mót. Ég get ekki gert meira. Nú verð ég að bíða og sjá til hvað gerist.“
