Ragnar Þór Ingólfsson, formaður VR, og Vilhjálmur Birgisson, formaður Verkalýðsfélags Akraness, telja að núverandi forysta Alþýðusambandsins þurfi að íhuga stöðu sína. Hún sé að fjarlægjast hinn almenna félagsmann.
„Ég hef verið spurður að því hvort það væri klofningur milli VR og ASÍ, en þetta er klofningur forystu ASÍ frá fólkinu í landinu,“ segir Ragnar.
„Eftir hrun er verið að reisa fjármálakerfið á nákvæmlega sömu brauðfótum og það hrundi á. Það hefur ekki verið hlustað á fólkið sem vill breyta þessu kerfi. Staða baráttunnar er sú að við erum ofboðslega stór og öflug hreyfing og virðumst ekki vera að nýta okkur samtakamáttinn og stærð okkar nægilega vel til að koma okkar baráttumálum fram.“
Dagskrá verkalýðsdagsins í ár var með öðru móti en undanfarin ár þar sem tveir kröfufundir fóru fram í miðbænum, eins og fram hefur komið. Ragnar tók þátt á fundinum sem ASÍ stóð ekki fyrir og sakaði ASÍ um blekkingaleik.
„Þegar forseti ASÍ er að gera lítið úr völdum sínum og aðkomu er það broslegt miðað við það sem ég hef orðið vitni að síðustu átta ár í stjórn VR,“ útskýrir Ragnar.
Vilhjálmur Birgisson tekur undir með Ragnari um að forysta ASÍ standi höllum fæti. Honum finnst vanta meiri kraft í verkalýðshreyfinguna. „Mér finnst hún hafa fjarlægst almenna félagsmenn. Hún þarf að fara í ítarlega naflaskoðun.“
Ellen Calmon, formaður Öryrkjabandalags Íslands, hélt erindi á sama fundi og Ragnar eftir að hafa verið neitað um að tala á baráttufundum þann 1. maí frá því að hún tók við stöðu sinni, árið 2013. „Ég ætla nú ekki að úttala mig um forystu ASÍ. En mér finnst óeðlilegt að forystufólkið í baráttu fyrir bættum kjörum örorkulífeyrisþega fái ekki að tala 1. maí. Það þekkist á Norðurlöndum að systurfélög okkar þar fái að taka þátt. Það er verið að útiloka ákveðinn hóp.“
Valmundur Valmundsson, formaður Sjómannasambandsins, telur að ef ósætti ríki um forystuna ætti að fylgja verklagi og láta það í ljós í kosningum. „Það er ársþing á tveggja ára fresti og formannafundir þess á milli. Þar er forysta ASÍ kosin og ég held að rétti vettvangurinn sé þar ef á að breyta til. Ef fólk vill ekki þessa forystu þá verður að kjósa nýja.“
Kristján Þórður Snæbjarnarson, formaður Rafiðnaðarsambandsins, telur að innan ASÍ megi fara yfir málin og verklagið. „Það þarf meiri hlustun og skilning á almennum félagsmönnum. Að mörgu leyti erum við á réttri leið en auðvitað má alltaf bæta eitthvað.“
Telja að forysta ASÍ þurfi að íhuga stöðu sína
Tengdar fréttir
Talar fyrir réttindum öryrkja en ekki stofnun Sósíalistaflokksins
Dagskrá verkalýðsdagsins í ár er með örlítið öðru móti en undanfarin ár þar sem að tveir kröfufundir fara fram í miðbæ Reykjavíkur. Um hundrað metrar aðskilja sviðin tvö.
Margt um manninn í miðbænum á verkalýðsdaginn
Fjölmargir kröfðust bættra réttinda í höfuðborginni í dag á verkalýðsdaginn, 1. maí. Kröfuganga lagði af stað frá Hlemmi eftir hádegi og gekk fylktu liði niður Laugaveg. Þá kom fólk saman á útifundum á Ingólfstorgi og Austurvelli.
Lífeyrissjóðir hafi hag af lágum launum
Lífeyrissjóðirnir hagnast á þröngri stöðu launþega; hafa hag af hárri álagningu, lágum launum og hafa of mikil ítök á húsnæðismarkaði. Þetta segir nýr formaður VR og vill róttækar breytingar.
