Naumt tap í EuroLeague

Alba Berlín tapaði naumlega fyrir AX Milan í EuroLeague á heimavelli í kvöld.

Martin Hermannsson skoraði sjö stig fyrir Alba Berlin og gaf fimm stoðsendingar í 78-81 tapinu.

Heimamenn í Berlínarliðnu voru sterkari í fyrri hálfleik og náðu þeir að halda gestunum frá Ítalíu í aðeins níu stigum í öðrum leikhluta. Staðan í hálfleik var 33-26 fyrir Alba Berlín.

Ítalirnir tóku hins vegar þriðja leikhluta með tíu stigum og komu sér í bílstjórasætið. Lok leiksins voru æsispennandi en heimamenn náðu ekki að jafna leikinn og töpuðu að lokum með þremur stigum.

Alba hefur nú tapað fjórum af fyrstu fimm leikjum sínum í EuroLeague og eru í næst síðasta sæti deildarinnar.