Nokkrir skjálftar hafa orðið í norðanverðum Mýrdalsjökli í nótt. Sá stærsti varð klukkan 05:36 í morgun og mældist 3,3 að stærð um 7,5 kílómetra austnorðaustur af Goðabungu.
Annar skjálfti varð á svipuðum slóðum klukkan tvö í nótt og var sá 2,7 að stærð.
Þetta kemur fram í athugasemdum jarðvísindamanns hjá Veðurstofu Íslands. Þar segir að minni skjálftar hafi einnig mælst en aukning í skjálftavirkni yfir sumartímann í Mýrdalsjökli hafi orðið reglulega undanfarin ár.
