38 greindust með kórónuveiruna innanlands í gær. Tuttugu og einn þeirra voru ekki í sóttkví við greiningu.
Þetta kemur fram í uppfærðum tölum á vefnum covid.is, en alls hafa því 134 greinst innanlands síðustu þrjá sólarhringa. Tveir eru á sjúkrahúsi vegna Covid-19 líkt og í gær.
Eitt smit greindist á landamærum, en þar er beðið niðurstöðu mótefnamælingar.
215 manns eru nú í einangrun, samanborið við 181 í gær. Þá eru 1290 í sóttkví, en þeir voru 765 í gær.
Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur er 51,5 en var 41,7 í gær. Þá er nýgengi landamærasmita nú 5,7 en var 4,9 í gær.
Nú hafa 2.345 manns greinst smitaðir af kórónuveiru frá upphafi faraldursins. Tíu þeirra sem hafa veikst af Covid-19 eru látnir.
Alls voru tekin 1.077 einkennasýni hjá sýkla- og veirufræðideild Landspítalans og Íslenskri erfðagreiningu í gær og 1.054 sýni á landamærunum eða í seinni landamæraskimun. Þá voru 260 sýni tekin í annarri skimun hjá Íslenskri erfðagreiningu. Þá voru 67 sýni tekin í sóttkvíar- og handahófsskimun.
