Harður heimur CrossFit Open: Varð heimsmeistari í 21.1 en endar í 1557. sæti

Allar æfingar í opna hluta heimsleikanna í CrossFit hafa nú skilað sér inn til CrossFit samtakanna og nú á aðeins eftir að staðfesta endanlega úrslitin. Katrín Tanja Davíðsdóttir og Þuríður Erla Helgadóttir voru efstar af Íslendingum í Open í ár en þau sem voru efst íslensku keppendanna eftir tvær fyrstu vikurnar féllu aftur á móti niður um mörg sæti.

Þriðji hluti CrossFit Open 2021 var ekki ein æfing heldur tvær. Keppendur áttu að taka æfingu 21.3 og svo æfingu 21.4 strax á eftir. Þetta bauð upp á miklar sviptingar í lokavikunni. Það varð líka raunin.

Björgvin Karl Guðmundsson og Jóhanna Júlía Júlíusdóttir voru bæði ofarlega eftir 21.1 og 21.2 en féllu niður listann eftir 21.3. og 21.4.

Björgvin Karl er áfram efstur íslenskra karla en fall Jóhönnu Júlíu var gríðarlegt í síðustu vikunni.

Jóhanna Júlía varð heimsmeistari í 21.1 og var í áttunda sæti eftir tvær fyrstu vikurnar. Hún endar í 1557. sæti og féll því niður um 1549 sæti í lokavikunni.

Jóhanna Júlía var með 826. besta árangurinn í 21.3 á heimsvísu en í 21.4 endaði hún í 10.944. sæti. Þetta þýðir ekki aðeins að Jóhanna Júlía datt niður úr hópi þeirra bestu heldur endaði hún bara í tuttugasta sæti meðal íslensku stelpnanna.

Jóhanna Júlía tjáði sig um vonbrigðin eins og sjá má hér fyrir neðan.

Þarna kemur meðal annars fram að hún hafi ekki getað lyft þungu í marga mánuði þar sem hún hefur verið slæm í bakinu.

„Þegar þessi æfing var opinberuð þá vissi ég að þetta yrði mín stærsta áskorun. Ég veit að ég er ekki ein af sterkustu stelpunum og verð það líklega aldrei. Ég veit um leið að ég hef aðra styrkleika sem vonandi geta unnið upp veikleika mína,“ skrifaði Jóhanna Júlía á Instagram.

„Þessi lokastaða eru engin endalok fyrir mig. Ég þarf bara að vera með hökuna uppi og halda áfram að vinna með jákvæðni og af ákveðni. Það er einmitt það sem ég ætla að gera,“ skrifaði Jóhanna Júlía.

Katrín Tanja Davíðsdóttir varð í fjórtánda sæti á heimsvísu og efst íslensku stelpnanna. Þuríður Erla Helgadóttir varð í 29. sæti og Anníe Mist Þórisdóttir varð í 118. sæti.

Fjórða af íslensku stelpunum varð Sólveig Sigurðardóttir og Hallgerður María Friðriksdóttir varð síðan í fimmta sætinu með Íslendinga.

Björgvin Karl náði bestum árangri íslensku karlanna en í lokavikunni fór hann samt úr sjötta sætinu niður í 73. sæti eftir æfingarnar tvær í lokavikunni.

Annar Íslendinganna var Haraldur Holgeirsson sem endaði í 85. sæti á heimsvísu og þriðji varð síðan Sigurður Jónsson sem varð í 152. sæti í heildarkeppninni. Þröstur Ólason varð fjórði hæstur íslensku strákanna og Fannar Hafsteinsson varð síðan fimmti.

Ástralinn Tia-Clair Toomey-Orr vann The Open hjá konunum þar sem hin sautján ára Emma Cary varð önnur og Kara Saunders tók síðan þriðja sætið. Kanadamaðurinn Jeffrey Adler vann The Open hjá körlunum en Scott Panchik varð annar og Travis Mead þriðji.

Besti árangur íslensku stelpnanna er hér.

Besti árangur íslensku strákanna er hér.