Enski boltinn

Leikur sinn fyrsta leik í rúmlega sjöhundruð daga

Hjörtur Leó Guðjónsson skrifar
Svo virðist sem að hlutirnir séu loks að ganga upp hjá hinum 29 ára gamla Phil Jones.
Svo virðist sem að hlutirnir séu loks að ganga upp hjá hinum 29 ára gamla Phil Jones. Getty/Matthew Peters

Enski knattspyrnumaðurinn Phil Jones er í byrjunarliði Manchester United sem leikur gegn Wolves í ensku úrvalsdeildinni í þessum töluðu orðum. Hann lék seinast fyrir United þann 26. janúar árið 2020.

Það eru því rétt tæplega tvö ár síðan að Jones lék keppnisleik með aðalliði Manchester United, en það var gegn Tranmere Rovers í bikarnum. United vann leikinn 6-0 og Phil Jones skoraði eitt marka United.

Jones hefur glímt við þrálát meiðsli síðan, en fjarvera Harry Maguire, Victor Lindelöf og Eric Bailly gerir það að verkum að hann gengur beint inn í byrjunarliðið í hjarta varnarinnar við hlið Raphael Varane.

Ralf Rangnick, bráðabirgðastjóri United, segir að eftir að hafa fylgst með Jones á æfingum og í leikjum með U-23 ára liði United undanfarnar fjórar vikur hafi það verið rökrétt ákvörðun að gefa honum tækifærið.

„Ég get aðeins dæmt Phil Jones út frá seinustu fjórum vikum og hann hefur alltaf verið mjög fagmannlegur. Hann hefur tekið mikinn þátt og fyrst að hinir þrír miðverðirnir eru úr leik þá var það rökrétt ákvörðun að velja hann,“ sagði Rangnick í viðtali fyrir leikinn.

Enski boltinn

Tengdar fréttir

Mest lesið


Fleiri fréttir

Sjá meira


×

Mest lesið