Vöngum hefur verið velt yfir framtíð portúgölsku goðsagnarinnar en endurkoma hans til Manchester United síðasta sumar hefur ekki verið eins og kappinn sá fyrir sér. Hann er nú sagður leita allra leiða til að komast burt frá félaginu eftir að Hollendingurinn Erik ten Hag tók við þjálfun liðsins í sumar.
Þónokkur lið hafa verið orðuð við hann í sumar, sem ýmist hafa sagst ekki hafa áhuga eða hafa tæplega efni á afar háum launum Portúgalans. Þar á meðal eru bæði Barcelona og Chelsea.
Breskir fjölmiðlar greina hins vegar frá því í dag að lausn gæti verið í augsýn. Diego Simeone, þjálfari Atlético Madrid, er sagður hafa auga á Ronaldo til að fylla skarð Luis Suárez, hjá félaginu, sem rann út á samningi fyrr í sumar.
According to reports, Cristiano Ronaldo is open to joining Atletico Madrid
— Sky Sports Premier League (@SkySportsPL) July 23, 2022
Ronaldo er sagður vera opinn fyrir möguleikanum að spila fyrir Atlético en hann vill spila fyrir félag í Meistaradeild Evrópu. Hann sé reiðubúinn að taka á sig launalækkun um 30 prósent til að freista þess að vinna Meistaradeildina með félaginu.
Sá portúgalski mun þó þurfa að vinna fyrir því að ná stuðningsmönnum liðsins á sitt band en hann lék í níu ár með grönnunum í Real Madrid og var gjarn á að senda þeim tóninn. Á tíma sínum hjá Real var Atlético það lið sem Ronaldo skoraði flest mörk gegn og þá gerði hann grín að stuðningsmönnum liðsins þegar hann var leikmaður Juventus árið 2019. Eftir sigur ítalska liðsins á Madrídingum sýndi hann handabendingar sem gáfu í skyn að hann hafi unnið fimm Meistaradeildartitla en Atlético engan.
