Í hugleiðingum veðurfræðings segir að hiti verði á bilinu tíu til 24 stig og verður hlýjast inn til landsins fyrir norðan og austan.
„Um helgina eru ekki stórar breytingar í kortunum. Suðlæg eða breytileg átt, skýjað með dálítilli vætu vestantil en bjart að mestu á austurhelmingi landsins en líkur á síðdegisskúrum þar. Frekar svalt vestanlands en hlýtt á Austurlandi.
Frá og með mánudegi er útlit fyrir breytilegar áttir, vætu með köflum á víð og dreif og kólnar hægt og bítandi í veðri.“
Veðurhorfur á landinu næstu daga
Á laugardag (lýðveldisdagurinn): Suðvestlæg átt 3-8 m/s en 8-13 norðvestantil. Dálítil rigning um vestanvert landið, en bjart að mestu austantil og sums staðar þokusúld við ströndina. Hiti 10 til 25 stig yfir daginn, hlýjast í innsveitum austanlands.
Á sunnudag: Suðlæg eða breytileg átt 3-8 og væta með köflum vestanlands. Bjart að mestu austantil með stöku síðdegisskúrum. Hiti 8 til 23 stig, svalast við norður- og vesturströndina, en hlýjast á Austurlandi.
Á mánudag: Breytileg átt 3-8. Víða rigning eða skúrir en þurrt og bjart að mestu austanlands. Hiti 8 til 18 stig, hlýjast norðaustantil.
Á þriðjudag: Vestlæg eða breytileg átt 3-10 og dálítil rigning eða skúrir í flestum landshlutum. Hiti yfirleitt 8 til 18 stig að deginum, hlýjast fyrir austan.
Á miðvikudag (sumarsólstöður): Suðlæg eða breytileg átt, bjart með köflum en stöku skúrir á víð og dreif. Hiti yfirleitt 8 til 13 stig.
Á fimmtudag: Útlit fyrir suðlæga átt. Rigning eða súld með köflum á sunnan- og vestanverðu landinu en annars úrkomulítið. Hiti 10 tli 15 stig.
