Á vef Veðurstofunnar segir að í nótt og á morgun muni lægðin fjarlægjast landið og muni þá lægja og birta til en við norðausturströndina verði norðvestan strekkingur eða allhvass vindur með ofankomu fram yfir hádegi.
Hiti verður yfirleitt í kringum frostmark en að sjö stigum við suðausturströndina. Það mun svo heldur kólna annað kvöld.
Veðurhorfur á landinu næstu daga
Á þriðjudag: Norðvestan 10-15 m/s og él norðaustantil framan af degi, annars mun hægari og bjartviðri. Hiti í kringum frostmark. Vaxandi austanátt syðst um kvöldið og þykknar upp með hlýnandi veðri.
Á miðvikudag: Austlæg átt með rigningu eða slyddu, en slydda eða snjókoma á norðanverðu landinu seinnipartinn. Hiti 0 til 7 stig, mildast syðst.
Á fimmtudag: Norðlæg átt með snjókomu um landið norðanvert, en slyddu austast. Úrkomulítið sunnantil. Vægt frost en hiti að 5 stigum syðst yfir daginn Lægir, styttir víða upp og frystir um kvöldið.
Á föstudag: Vaxandi sunnanátt og með rigningu, en þurrt að kalla norðaustanlands. Hlýnar í veðri.
Á laugardag: Útlit fyrir sunnan og suðvestan hvassviðri með rigningu. Hlýtt í veðri.
Á sunnudag: Líklega vestlæg átt með éljum, en þurrt að kalla austanlands.
