Á vef Veðurstofunnar segir að það verði áfram kalt í veðri og dálítil él norðan- og austanlands, en bjartviðri sunnan heiða. Hvessir aðeins á Vestfjörðum í kvöld.
Gera má ráð fyrir að frost verði á bilinu eitt til tólf stig og kaldast inn til landsins.
„Norðaustan kaldi eða strekkingur á morgun. Lítilsháttar él fyrir norðan og yfirleitt bjart sunnantil, en líkur á stöku éljum á Suðvesturlandi. Bætir heldur í ofankomu norðaustanlands um kvöldið. Frost um allt land,“ segir á vef Veðurstofunnar.
Veðurhorfur á landinu næstu daga
Á föstudag: Norðaustan og norðan 5-13 m/s og dálítil él á víð og dreif, en bætir í ofankomu á Norður- og Austurlandi um kvöldið. Frost 2 til 12 stig, kaldast inn til landsins.
Á laugardag: Norðaustlæg átt 5-13, en hvassviðri við suðausturströndina. Víða bjart, en skýjað og stöku él norðaustantil. Hiti breytist lítið.
Á sunnudag: Norðaustan 8-15, en 15-23 á Suðausturlandi. Dálítil snjókoma um landið norðaustanvert, en bjart með köflum sunnan heiða. Frost 2 til 10 stig.
Á mánudag: Norðlæg átt og lítilsháttar él, en þurrt og bjart sunnan- og vestanlands. Áfram kalt í veðri.
Á þriðjudag og miðvikudag: Útlit fyrir suðvestlæga eða breytilega átt og stöku él, en yfirleitt bjart fyrir austan. Hlýnar í veðri.
