Besta-spáin 2025: Nýir tímar en sömu væntingar á Hlíðar­enda

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild kvenna með árlegri spá sinni fyrir mótið. Keppni í deildinni hefst með tveimur leikjum í dag, þriðjudaginn 15. apríl.

Íþróttadeild spáir Val 2. sæti Bestu deildarinnar í sumar og liðið lendi þar með á sama stað og á síðasta tímabili.

Valur varð Íslandsmeistari þrjú ár í röð (2021-23) og gat unnið fjórða titilinn í röð í fyrra. Liðið varð bikarmeistari eftir sigur á Breiðabliki en Íslandsmeistaratitilinn gekk Valskonum úr greipum eftir markalaust jafntefli við Blika í úrslitaleik í lokaumferð Bestu deildarinnar.

Eftir tímabilið hætti Pétur Pétursson sem þjálfari Vals. Hann stýrði liðinu í sjö ár og á þeim tíma varð það fjórum sinnum Íslandsmeistari og tvisvar sinnum bikarmeistari.

Við starfi Péturs tóku Kristján Guðmundsson og Matthías Guðmundsson. Kristján er þrautreyndur þjálfari og stýrði meðal annars karlaliði Vals tímabilin 2011 og 2012. Matthías er svo fyrrverandi leikmaður Vals og var í þjálfarateymi kvennaliðsins áður en hann tók við Gróttu fyrir síðasta tímabil. Hann var hársbreidd frá því að koma Seltirningum upp í Bestu deildina og landaði svo þjálfarastarfinu hjá gamla félaginu sínu.

Eins og síðustu ár hafa orðið talsverðar breytingar á leikmannahópi Vals. Liðið hefur misst sterka pósta og virðist standa eftir í mínus eftir félagaskiptagluggann.

Valur seldi tvo bestu ungu leikmenn sína, Fanneyju Ingu Birkisdóttur og Ísabellu Söru Tryggvadóttur, til Svíþjóðar. Katie Cousins fór aftur í Þrótt og Berglind Björg Þorvaldsdóttir sneri aftur til Breiðabliks. Auk þeirra eru Málfríður Anna Eiríksdóttir, Þórdís Hrönn Sigfúsdóttir og Haily Whitaker horfnar á braut. Þetta er enginn smá missir.

Til að fylla þessi skörð hefur Valur fengið nokkra leikmenn auk þess sem margar sem voru annars staðar á láni í fyrra eru komnar aftur á Hlíðarenda. Koma verður í ljós hverjar þeirra munu hjálpa Val í sumar.

Tinna Brá Magnúsdóttir kom frá Fylki og ver mark Vals í stað Fanneyjar. Jordyn Rhodes, sem var einn markahæsti leikmaður Bestu deildarinnar í fyrra, kom frá Tindastóli. Þá er Elín Metta Jensen komin með félagaskipti aftur í Val en hún lék ekkert í fyrra vegna barneigna.

Hvað segir sérfræðingurinn?

„Valskonur mæta til leiks í hefndarhug, staðráðnar í að endurheimta Íslandsmeistaratitilinn sem þær voru hársbreidd frá í fyrra,“ segir Mist Rúnarsdóttir sem er sérfræðingur Bestu markanna eins og síðustu ár. 

„Stóru fréttirnar af Valsliðinu eru þjálfaraskiptin. Pétur Pétursson steig frá borði í haust og þeir Kristján Guðmundsson og Matthías Guðmundsson tóku við. Báðir eru þeir mjög færir þjálfarar og verður áhugavert að fylgjast með þeirra samvinnu og hvaða áherslur þeir koma með.“

„Það hafa orðið töluverðar breytingar á leikmannahópi liðsins en gríðarlega öflugur kjarninn er á sínum stað og í liðinu er heilmikil reynsla og sigurhefð. Markvörðurinn öflugi, Tinna Brá Magnúsdóttir, kemur inn í reynslumikla öftustu línu og stormsenterinn Jordyn Rhodes var sótt á Krókinn. Hún skoraði tólf mörk fyrir Stólana í fyrra og það verður áhugavert að sjá hvað hún getur gert fyrir Valsliðið.“

„Það eru ótrúleg gæði og breidd á Hlíðarenda og Valskonur settu tóninn með því að vinna sína helstu samkeppnisaðila í Meistarakeppninni á föstudag. Gott veganesti inn í Íslandsmótið þar sem þær ætla sér að bæta upp fyrir vonbrigðin á lokasprettinum í fyrra.“

Fylgist með

Hin stórefnilega Arnfríður Auður Arnardóttir fylgdi Matthíasi frá Gróttu. Á síðasta tímabili skoraði hún níu mörk í átján leikjum í Lengjudeildinni en þrátt fyrir að vera aðeins nýorðin sautján ára hefur Arnfríður leikið fjörutíu deildarleiki í meistaraflokki og skorað tuttugu mörk. Hún gæti sprungið út hjá Val í sumar.

Í besta/versta falli

Valur hefur verið í tveimur af efstu sætum efstu deildar undanfarin sex ár og það breytist varla í sumar. Breiðablik virðist vera með sterkasta liðið mínútu í mót en ef einhver getur komið í veg fyrir að Kópavogsliðið verji titilinn er það Valur.