Arsenal tapaði í París og titlalaust tíma­bil stað­reynd

Paris Saint-Germain komst í kvöld í úrslitaleik Meistaradeildar Evrópu í fótbolta eftir 2-1 sigur á Arsenal í seinni undanúrslitaleik liðanna.

Parísarliðið vann fyrri leikinn 1-0 í London og þar með einvígið 3-1 samanlagt.

Það verða því franska liðið og Internazionale frá Ítalíu sem spila til úrslita í Meistaradeildinni í München í ár. PSG var líka í úrslitaleiknum fyrir fimm árum en franska félagið hefur aldrei unnið Meistaradeildina.

Arsenal byrjaði leikinn í kvöld vel en náði ekki að ógna mark PSG nægilega mikið á þessum góðu upphafsmínútum liðsins.

PSG skaut aftur á móti í stöng í fyrstu sókn sinni (Kvicha Kvaratskhelia) og skoraði síðan úr föstu leikatriði.

Arsenal menn skölluðu þá aukaspyrnu frá marki sínu en þó ekki lengra en út á vítateigslínu þar sem Fabián Ruiz lagði boltann fyrir sig og skoraði með flottu skoti.

1-0 í hálfleik og Arsenal þurfti því tvö mörk í síðari hálfleik.

PSG fékk dauðafæri til að auka muninn þegar dómarinn fór í skjáinn og dæmdi hendi á Myles Lewis-Skelly. Gott dæmi um það þegar verið er að nota Varsjána til að dæma leikinn en ekki að leiðrétta mistök.

David Raya hélt sínu liði á lífi með því að verja lélega vítaspyrnu Vitinha.

Þetta var samt stutt gaman því aðeins þremur mínútum síðar var Achraf Hakimi búinn að koma PSG í 2-0 eftir sendingu frá Ousmane Dembélé. Útlitið svart hjá enska liðinu enda þremur mörkum undir samanlagt.

Arsenal gafst samt ekki upp og Bukayo Saka minnkaði muninn á 76. mínútu. Fjórtán mínútur eftir og Arsenal þurfti tvö mörk.

Saka fékk algjört dauðafæri stuttu síðar en skaut yfir. Mark þar hefði breytt miklu og sett mikla pressu á heimamenn. Þess í stað rann leikurinn út án þess að Arsenal næði að ógna heimamönnum mikið.