Martin flottur þegar Alba Ber­lín tryggði sig inn í úr­slita­keppnina

Alba vann þá 32 stiga sigur á Göttingen, 101-69, eftir að hafa verið átján stigum yfir í hálfleik, 55-37.

Þetta var lokaleikur liðsins á tímabilinu og tryggir þeim eitt af sex efstu sætunum í deildinni. Sex efstu sætin fara beint í úrslitakeppnina en næstu fjögur lið spila um síðustu tvö sætin í umspili.

Martin var næststigahæstur í liðinu með 13 stig á nítján mínútum auk þess að gefa sjö stoðsendingar.

Útlitið var ekki bjart um tíma í baráttunni um sæti í úrslitakeppninni en frábær endasprettur er að skila liðinu inn í hana. Þetta var sjöundi sigur liðsins í síðustu átta deildarleikjum.

Liðið saknaði Martins þegar hann var meiddur en hann er sem betur fer fyrir Berlínarliðið að koma sterkur inn á lokasprettinum.