Isak dýrastur í sögu ensku úr­vals­deildarinnar

Sænski landsliðsmaðurinn kostar 125 milljónir punda, nærri 21 milljarð íslenskra króna. Er hann nú dýrasti leikmaður í sögu ensku úrvalsdeildarinnar. Hinn 25 ára gamli Isak mun klæðast treyju númer 9 hjá félaginu.

Ekki er langt síðan Liverpool gerði Florian Wirtz að dýrasta leikmanni í sögu enska boltans en það met stóð stutt. Það verður ekki annað sagt en að Englandsmeistararnir ætli sér að gera allt sem þeir geta til að verja titilinn. 

Isak kemur frá Newcastle United þar sem hann hefur verið undanfarin þrjú ár. Alls lék hann 109 leiki fyrir Newcastle, skoraði 62 mörk og gaf 11 stoðsendingar. Þar áður lék hann fyrir Real Sociedad á Spáni. 

Liverpool hefur hafið titilvörnina af krafti og unnið fyrstu þrjá leiki sína á tímabilinu.