Vinstriblokkin með nauman meiri­hluta í Noregi

Verkamannaflokkur Jonas Gahr Störe mælist stærstur með 28 prósent fylgi þegar 72 prósent atkvæða hafa verið talin. Nemur þetta aukningu upp á 1,8 prósentustig miðað við niðurstöður síðustu kosninga. Næst kemur Framfaraflokkur Silvie Listhaug með 24,8 prósent atkvæða. Flokkurinn er hástökkvari kosninganna og eykur fylgi sitt um 13,2 prósentustig frá árinu 2021. Hægri flokkur Ernu Solberg mælist með 14,3 prósent atkvæða og lækkar um sex prósentustig.

Miðflokkurinn mæist með 5,8 prósent, Sósíalíski vinstri flokkurinn með 5,5 prósent, Rauðir með 5,4 prósent og Græni umhverfisflokkurinn með 4,5 prósent. Kristilegi fólksflokkurinn mælist með 4,1 prósent og Venstre með 3,4 prósent fylgi. Aðrir mælast með minna.

Athygli vekur að Miðflokkurinn lækkar um heil 7,7 prósentustig milli kosninga en flokkurinn sleit ríkisstjórnarsamstarfi sínu við Verkamannaflokkinn í byrjun ársins. 

Síðustu kjörstöðum lokaði í Noregi klukkan sjö að íslenskum tíma. Mikil spenna hefur ríkt yfir niðurstöðum þingkosninganna og lengi verið útlit fyrir að flókin stjórnarmyndun taki við. 

Efnahagsmálin hafa verið ofarlega á baugi hjá kjósendum í kosningabaráttunni vegna dýrtíðar og ójöfnuðs. Raforkuverð hefur meðal annars verið í hæstu hæðum og komið til tals að hætta útflutningi rafmagns til Danmerkur, til að reyna að lækka raforkuverð til norsks almennings. Þá hefur meðal annars mikið verið þrætt um auðlegðarskatt.

Sat einn eftir í minnihlutastjórn

Síðasta kjörtímabil hefur verið viðburðaríkt og sleit Miðflokkurinn ríkisstjórnarsamstarfi sínu við Verkamannaflokkinn í janúar. Síðan þá hefur Verkamannaflokkurinn verið einn í minnihlutastjórn.

Eftir síðustu kosningar árið 2021 leiddi Verkamannaflokkur Jonas Gahr Störe ríkisstjórn landsins með Miðflokknum, gömlum bændaflokki á miðju norskra stjórnmála. Þá varði Sósíalíski vinstri flokkurinn minnihlutastjórn flokkanna tveggja falli eftir að hann hafnaði því að ganga inn í stjórnarsamstarfið, meðal annars vegna ágreinings um umhverfismál.

Miðflokkurinn sleit ríkisstjórnarsamstarfinu í janúar vegna deilna um innleiðingu á svonefndum fjórða orkupakka Evrópusambandsins. Hafnaði Miðflokkurinn frekara samstarfi við Evrópusambandið í orkumálum en Verkamannaflokkurinn vildi innleiða reglugerðirnar strax.

Fréttin er í vinnslu og verður uppfærð.