San Antonio - Denver

Þetta einvígi er eitt af þeim áhugaverðari í fyrstu umferðinni í ár. San Antonio er af mörgum talið líklegasta liðið í úrslitin í Vesturdeildinni, en meiðsli Tim Duncan og sú staðreynd að Denver er eitt heitasta liðið í deildinni á síðustu vikum, gera það að verkum að þetta gæti orðið mjög jafnt einvígi. Denver liðið olli miklum vonbrigðum framan af vetri, því miklar vonir voru bundnar við liðið eftir að það fékk til sín framherjann Kenyon Martin frá New Jersey Nets. Þetta slæma gengi varð til þess að þjálfari liðsins var rekinn og hinn reyndi þjálfari George Karl var ráðinn í staðinn. Árangurinn lét ekki á sér standa og liðið fór á kostum undir stjórn Karl, sem náði að binda liðið saman og hjálpaði til við að ná Carmelo Anthony úr þeirri lægð sem hann var í framan af vetri. Denver hefur á að skipa mjög sterku og hávöxnu liði, sem gæti átt eftir að valda San Antonio og Tim Duncan vandræðum. Þá er heimavöllur þeirra mjög sterkur og engum þykir gott að leika í þunna loftinu í Denver, sem stafar af því hve hátt borgin stendur yfir sjávarmáli. Ef lið Denver nær sér vel á strik og nær að keyra á sínu bestu mönnum, gætu þeir náð að koma á óvart gegn San Antonio. San Antonio Spurs eru með mjög óárennilegt lið sem hefur fáa veikleika og þeir hafa það fram yfir önnur lið að hafa unnið meistaratitilinn fyrir tveimur árum. Vörn liðsins er frábær og sóknarleikurinn mjög agaður. Ef Tim Duncan nær þokkalegri heilsu fljótlega, en hann segist sjálfur aðeins vera 70-80% klár í slaginn, verður liðið seint unnið og hefur alla burði til að fara alla leið. Fyrsti leikur liðanna er á sunnudagskvöld í San Antonio.