Kviðdómur í Edinborg úrskurðaði í gær að dagblaðið News of the World skyldi greiða skoska stjórnmálamanninum Tommy Sheridan 200.000 sterlingspund, andvirði 26,6 milljóna króna, í miskabætur fyrir meiðyrði, en blaðið hafði flutt ítrekaðar uppsláttarfréttir af meintu kynsvalli og kókaínneyslu þingmannsins.
Sheridan er leiðtogi Skoska sósíalistaflokksins og einn þekktasti stjórnmálamaðurinn á skoska þinginu. „Þeir eru lygarar, og við höfum sannað það,“ hrópaði Sheridan yfir utan dómhúsið, með eiginkonuna Gail sér við hlið, en hún bar vitni í réttarhaldinu.
