Breska lögreglan handtók í dag yfir tuttugu Rúmena fyrir barnaþrælkun. Sex börnum undir tíu ára aldri var bjargað úr klóm þeirra.
Börnin höfðu verið neydd til þess að betla og stela á götum Lundúna og í almenningsfarartækjum.
Lögreglan telur sig hafa upprætt umfangsmikinn barna þrælkunar hring með þessum handtökum.
Lögregluforinginn sem stjórnaði aðgerðunum sagði að fátækar fjölskyldur í Rúmeníu seldu börnin í hendur þrælahaldaranna gegn loforðum um peninga. Börnin séu svo neydd til þess að betla og stela.
Þetta minnir óneitanlega á söguna um Oliver Twist og illmennið Fagin sem sendi þau út í sama tilgangi.
