NBA-deildin er farin að leggja lokahönd á það hvernig hún ætlar að klára NBA-tímabilið sem fór í algjört frost þegar kórónuveirufaraldurinn fór á flug í Bandaríkjunum í marsmánuði.
Adrian Wojnarowski hefur það eftir sínum öflugu heimildarmönnum að fari lokaúrslit NBA-deildarinnar í körfubolta alla leið í leik sjö þá mun sá leikur fara fram 12. október næstkomandi.
Þetta þýðir að lokaúrslitin í NBA í ár munu því hefjast í lok september eða nokkrum dögum áður en Domino´s deild karla 2020-21 fer af stað. Fyrsta umferð Domino´s deildar karla á að fara fram 1. október.
ESPN Sources: As the NBA models a 22-team format for a July 31 resumption in Orlando, the proposed timeline for teams as the last possible date for an NBA Finals Game 7: October 12.
— Adrian Wojnarowski (@wojespn) June 2, 2020
NBA-deildin mun þó breyta nokkuð venjulegu fyrirkomulagi sínu til að geta klárað tímabilið. Væntanlega munu 22 lið (af 30) taka þátt í lokakafla 2019-20 tímabilsins en fyrirkomulagið verður kynnt á allra næstu dögum. NBA-deildin mun síðan hefjast á ný 31. júlí í Disney World í Orlando.
Sextán lið fara vanalega inn í úrslitakeppni NBA-deildarinnar í körfubolta en þegar leik var hætt þá voru sex önnur lið sex leikjum eða minna frá því að komast í úrslitakeppnissæti.
Það er því búist við því að þessi sex lið taki líka þátt í lokakaflanum þar sem liðin spila fyrst deildarleiki og fari svo í úrslitakeppni. Fyrstu leikir úrslitakeppninnar myndu þá vera leikir þar sem lið eru að spila um síðustu sætin inn í úrslitakeppnina.
