Real mörðu nafna sína í Valla­dolid | At­letico gerði marka­laust jafn­tefli

Spánarmeistarar Real Madrid mörðu nafna sína í Valladolid í spænsku úrvalsdeildinni í kvöld með einu marki gegn engu. Þá gerðu Atletico Madrid markalaust jafntefli á útivelli gegn Huesca.

Real Madrid hefur byrjað tímabilið frekar rólega og hélt það áfram í kvöld þó liðið hafi landað sigri. Eftir markalausan fyrri hálfleik þá sá Vinicius Junior til þess að meistararnir færu heim með stigin þrjú er hann skoraði eina mark leiksins á 65. mínutu.

Lokatölur 1-0 og Real því með sjö stig að loknum þremur umferðum. Þó Real hafi byrjað tímabilið rólega er það samt sem áður taplaust. 

Fyrr í dag gerðu nágrannar Real í Atletico markalaust jafntefli við Huesca en eftir að hafa unnið Granada 6-1 í síðustu umferð var reiknað með annarri flugeldasýningu. Hún kom ekki og Atletico því með fjögur stig eftir tvo leiki. 

Tveir aðrir leikir voru í spænsku úrvalsdeildinni í kvöld. Villareal vann 3-1 sigur á Deportivo Alaves. Þá vann Elche 1-0 útisigur á Eibar.