Í aðdraganda hlutafjárútboðs Icelandair haustið 2020 náðist samkomulag milli flugfélagsins og stjórnvalda um ríkisábyrgð á allt að 120 milljóna dala lánalínu, jafnvirði um 15,8 milljarða króna miðað við núverandi gengi, sem yrði veitt af Íslandsbanka og Landsbankanum. Ríkisábyrgð til tveggja ára myndi ná til yfir 90 prósenta af þessum lánum.
Skilmálar ríkisábyrgðarinnar voru þeir að eigið fé Icelandair héldist yfir 2 prósentum og þá yrði sett hámark á mánaðarlegan ádrátt á línuna að fjárhæð 20 milljónir Bandaríkjadala. Óheimilt yrði að draga á lánalínuna nema aðrir kostir væru fullreyndir.
Félag atvinnurekenda bendir á að flugrekstur sé í eðli sínu áhætturekstur og veiting ábyrgðarinnar feli því í sér áhættu fyrir skattgreiðendur.
„Að mati félagsins er þessi ábyrgð skattgreiðenda á láni til félagsins nú bæði óþörf og skaðleg. Hún er óþörf í fyrsta lagi vegna þess að Icelandair er byrjað að rétta úr kútnum og í öðru lagi vegna þess að til er orðið annað íslenzkt flugfélag sem heldur uppi flugsamgöngum við nágrannalönd,“ segir í umsögninni.
„Þá er hún einnig skaðleg sökum þess að til er orðin á ný innlend samkeppni í flugi til og frá landinu – sem er afar mikilvæg fyrir neytendur og atvinnulíf – því að ríkisábyrgðin veitir Icelandair óeðlilegt samkeppnisforskot á keppinaut sinn, Play Air, í formi lægri fjármagnskostnaðar.“
Innherji er nýr sjálfstæður áskriftarmiðill innan Vísis sem mun einkum beina kastljósinu að viðskiptalífinu, efnahagsmálum og stjórnmálum. Fyrst um sinn verður efnið endurgjaldslaust og aðgengilegt öllum á Vísi en með tímanum verður einungis hægt að nálgast Innherja gegn greiðslu. Áhersla er lögð á vandaðar fréttir, fréttaskýringar, viðtöl og hlaðvörp auk þess sem Innherja er ætlaður að vera vettvangur skoðanaskipta fólks úr atvinnulífinu og stjórnmálum.
