Silfurmönnum síðasta móts mistókst að skora hjá Marokkó

Silfurlið síðasta heimsmeistaramóts, Króatía, gerði markalaust jafntefli við Marokkó í fyrsta leik dagsins á HM í Katar. Þetta var þriðja markalausa jafnteflið í síðustu fjórum leikjum á HM.

Fátt var um fína drætti í leiknum á Al Bayt leikvanginum í dag. Króatar voru meira með boltann og voru ívið hættulegri.

Í uppbótartíma fyrri hálfleiks átti Nikola Vlasic skot sem Bono, markvörður Marokkóa, varði. Á 64. mínútu bjargaði Sofyan Amrabat svo nánast á línu frá Dejan Lovren.

Í seinni leik dagsins í F-riðli mætast Belgía og Kanada. Leikurinn hefst klukkan 19:00 í kvöld.