Ríkisendurskoðandi gagnrýnir viðbrögð forráðamanna Bankasýslunnar við þeim ákúrum sem fram koma í sátt Fjármálaeftirlitsins við Íslandsbanka. Bankasýslan sé langt í frá laus við ábyrgð á því hvernig staðið var að útboðinu á 22,5 prósenta hlut ríkisins í bankanum.
Við greinum frá því að þrátt fyrir yfirlýsingar virðist ekkert vera að gerast á vettvangi stjórnvalda varðandi leyfi til að gefa fullorðnum einstaklingum með SMA taugahrörnunarsjúkdóminn lyf við sjúkdómnum. Lyfið er eingöngu gefið þeim sem eru yngri en 18 ára.
Það er tekist á um vindmyllur í Þykkvabæ þar sem verið er að undirbúa uppsetningu þeirra þrátt fyrir að meirihluti íbúanna sé þeim andvígur.
Við kíkjum við í beinni á N-1 fótboltamótið á Akureyri þar sem um tvö þúsund krakkar sparka bolta á milli sín fram á sunnudag og sýnum frá athöfn þar sem Karl III var krýndur konungur Skotlands í dag.
Þetta og fleira á samtengdum rásum Bylgjunnar og Stöðvar 2 klukkan hálf sjö.
