Ellefu ára breskur strákur brást skjótt við þegar maður veittist að móður hans í Swardeston, skammt frá Norwich. Mæðginin voru að koma út úr bakaríi. Maðurinn sló til konunnar og jós yfir hana svívirðingum.
Þeim var auðvitað báðum mjög brugðið. En sonurinn bar á sér Starwars geislasverð. Hann brá samstundis sverðinu og lét höggin dynja á árásarmanninum, sem lagði á flótta.
Allan Jennings, talsmaður lögreglunnar í Norfolk bað sjónvarvotta um að gefa sig fram. Mikið hefði gengið á þegar þetta gerðist, og örugglega einhverjir orðið varir við það. Jennings sagði að móðirin hefði ekkert kannast við árásarmanninn og ekki væri nein sýnileg ástæða fyrir árásinni.
