„Sáttin átti að verða okkar leiðarljós,“ sagði Kristján í þingræðu þann 11. desember árið 2012. Þar lýsti hann þeirri skoðun sinni að breiðari sátt hefði náðst ef tillaga verkefnisstjórnar hefði fengið að standa í aðalatriðum og harmaði að slíkt hefði ekki tekist.
„Það er það sem ég gagnrýni og þess vegna segi ég að þessi rammaáætlun er þar með komin með allt of pólitískt yfirbragð,“ sagði Kristján. Nefndi hann fjóra vatnsaflskosti í þessu sambandi, Hvammsvirkjun og Holtavirkjun í Þjórsá og Hagavatnsvirkjun og Hólmsárvirkjun við Atley, sem hann taldi að hefði átt að halda í nýtingarflokki.
„Þess vegna set ég fyrirvara, ég tel að það sé gengið of langt í að setja hagkvæmar vatnsaflsvirkjanir eins og tvær efri virkjanirnar í Þjórsá í bið og á móti gengið of langt í að taka jarðhitasvæði á Reykjanesi í nýtingarflokk. Hvers vegna var það gert? Ég sé ekki rökin,“ sagði Kristján og sagði um rammaáætlunarferlið: „Þess vegna tel ég að okkur sé að mistakast.“
Hann vitnaði til þess að nokkrir gestir sem komu fyrir þingnefndina hefðu sagt að með þessum aðgerðum væri verið að gera þetta að rammaáætlun viðkomandi ríkisstjórnar.
„Ég óttast það, virðulegi forseti, að væntanlegar ríkisstjórnir muni vitna í þetta inngrip þegar þær fara að breyta rammaáætlun og að hin faglegu sjónarmið verði ekki lengur látin ráða. Þar með hefjast aftur miklar deilur um vernd og nýtingu orkusvæða,“ sagði Kristján í þingræðunni í desember 2012.
Þá lýsti hann jafnframt þeirri skoðun að Alþingi gæti tekið faglega afstöðu til röðunar virkjana í flokka.
„Ég tel að hinn þinglegi ferill hjá nefndum, þar sem gestir koma, aðilar senda inn umsóknir og við ræðum málin, sé fagleg vinnubrögð og að við alþingismenn getum tekið svona ákvörðun, byggða á gögnum sem lögð eru fram af sérfræðingum og okkur vitrara fólki hvað þetta varðar. Virðulegi forseti, við getum haft það í okkar höndum að vega og meta þessi gögn og taka endanlega ákvörðun,“ sagði Kristján L. Möller og taldi engan vafa um þennan rétt Alþingis. „Ég hef alltaf skilið hlutina þannig og ég blæs á að Alþingi geti ekki tekið faglega afstöðu eftir vinnu í þingnefnd,“ sagði Kristján í ræðustól Alþingis fyrir tveimur og hálfu ári.
Kristján sagði í samtali við fréttastofu í dag að andstaða sín núna við tillögu meirihluta atvinnuveganefndar byggðist á því að hann telji að lögformlegu ferli sé ekki lokið. Það sé stutt með minnisblaði umhverfis- og auðlindaráðuneytis og þeirri staðreynd að ráðherra hafi aðeins treyst sér til að leggja til að ein virkjun, Hvammsvirkjun, yrði færð í nýtingarflokk.
