Rafleiðni í Skaftá hefur hækkað jafnt og þétt síðan fyrir helgi en lítið hlaup er nú í gangi í ánni.
Í athugasemd sérfræðings Veðurstofu Íslands í kvöld segir að rennsli hafi aukist lítillega í ánni.
Hlaupið kemur úr Vestri-Skaftárkatli. Síðast hljóp úr þeim katli í ágúst 2018 og er því ekki búist við að um stórt hlaup verði að ræða.
Er fólki bent á að staldra ekki lengi við nálægt upptökum árinnar vegna hugsanlegrar gasmengunar. Veðurstofan mun áfram fylgjast með gangi mála.
