Braun tilkynnir þessa ákvörðun sína í langri færslu á Instagram. Þar segist hann ætla að einbeita sér að öðrum hlutum, svo sem föðurhlutverkinu og fyrirtækinu HYBE America, þar sem hann gegnir stjórnunarstöðu. Á instagram hefur hann einnig birt myndir frá ferlinum.
Leiðir skildu milli Braun og vinsælla tónlistarmanna á síðasta ári, þar á meðal Justin Bieber og Ariönu Grande. Ferill Braun fór á flug eftir að hann tók eftir Bieber að syngja á YouTube. Honum tókst að hafa uppi á móður Bieber og bauð honum plötusamning hjá útgáfu sem Braun hafði stofnað ásamt poppstjörnunni Usher.
Braun kveðst hafa tekið ákvörðun um að hætta eftir að „einn minn stærsti umbjóðandi og vinur sagði mér að hann ætlaði að breiða úr vængjum og leita annað“. Hann greinir ekki frá því hver sá umbjóðandi sé.
„Eftir því sem börn mín uxu úr grasi, og ég varð fyrir áföllum persónulega, komst ég að þeirri niðurstöðu að börnin mín þrjú séu súperstjörnur sem ég má ekki við að missa,“ skrifar Braun á Instagram.
„Þær fórnir sem ég var áður tilbúinn að gera get ég ekki lengur réttlætt,“ bætir hann við.
Braun komst einnig í fréttir þegar hann átti í deilum við Taylor Swift fyrir fimm árum. Braun festi kaup á útgáfufyrirtæki Swift og eignaðist þar með rétt á því að nýta tónlist Swift í auglýsingum og bíómyndum, sem Swift kom ítrekað í veg fyrir. Hún hóf svo að taka upp plötur sínar að nýju, til þess að gerast aðalrétthafi á ný og rýra virði gömlu platnanna.
