Guðmundur Björgvin Helgason ríkisendurskoðandi, mætti á Sprengisand til Kristjáns Kristjánssonar í morgun, þar sem umræðuefnið var Lindahvolsmálið svokallaða. Það hefur verið í algleymingi frá því að greinargerð Sigurðar Þórðarsonar, sem var settur ríkiendurskoðandi í málinu, var birt.
Greinargerðin innihaldi engar niðurstöður
Hann segir eðlilegt að menn spyrji sig að því hvers vegna miklu muni á greinargerð Sigurðar og skýrslu Skúla Eggerts Þórðarsonar fyrrverandi ríkisendurskoðanda um málið. Áður en það sé gert sé þó mikilvægt að átta sig á eðli greinargerðarinnar og forsögu hennar.
„Þegar hann skilaði þeirri greinargerð í lok júlí árið 2018, þá kemur það einfaldlega fram í skilabréfinu hans að greinargerðin ber ekki með sér niðurstöður og ályktanir vegna þess að hún er óklárað verk. Þannig þegar þú spyrð hvers vegna niðurstöðurnar eru svona ólíkar, þá vil ég bara byrja á því að benda á það fyrst að greinargerð Sigurðar Þórðarsonar hefur ekki að geyma neinar niðurstöður,“ segir Guðmundur Björgvin.
Fjölmargir annmarkar á ókláruðu skjali
Í greinargerð Sigurðar er að finna alvarlegar aðfinnslur á starfsemi Lindarhvols, sem var falið að sjá um svokallaðar stöðugleikaeignir ríkissjóðs, Guðmundur Björgvin segir fjölmarga annmarka á ókláruðu skjali Sigurðar og að það sé í raun marklaust plagg.
„Vinnunni var einfaldlega ekki lokið og kannski ekki síst, það sem mikilvægast er, að greinargerðin var aldrei send í andmælaferli. Andmælaferli, eða umsagnarferði eins og við köllum það, það er lykilatriði í gæðaeftirliti Ríkisendurskoðunar og okkar leið til að tryggja réttleika þeirra upplýsinga sem við förum með. Af því að traust og trúverðugleiki er Ríkisendurskoðun allt,“ Segir Guðmundur Björgvin Helgason. Samtal þeirra Kristjáns Kristjánssonar má heyra í heild sinni hér að neðan:
