Verði tilnefning hans staðfest af öldungadeildinni mun Isaacman taka við af hinum 82 ára gamla Bill Nelson, sem tilnefndur var af Joe Biden. Nelson er fyrrverandi þingmaður á báðum deildum Bandaríkjaþings og fór hann út í geim um borð í geimskutlunni Columbia í janúar 1986 en þá var hann þingmaður í fulltrúadeildinni.
Sú geimferð var sú síðasta fyrir Challenger-slysið.
Isaacman hefur tvisvar sinnum greitt SpaceX, fyrirtæki Elons Musk, fyrir að senda sig út í geim. Í fyrra skiptið var Isaacman á braut um jörðu í nokkra daga árið 2021. Fyrr á þessu ári fór hann svo ásamt þremur öðrum út í geim og í fyrstu borgaralegu geimferðina.
Þá fóru einkageimfararnir í allt að 1.400 kílómetra fjarlægð frá jörðu, sem er það lengsta sem nokkur maður hefur farið frá jörðinni síðan síðasta ferðin var farin til tunglsins.
Ný geimöld rétt að byrja
Trump sagði frá tilnefningunni á samfélagsmiðlum í kvöld og svaraði Isaacman færslu hans á X. Þar sagðist auðjöfurinn þakklátur fyrir tækifærið.
„Þar sem ég hef verið svo heppinn að sjá okkar frábæru plánetu úr geimnum, brenn ég fyrir því að Bandaríkin leiði þetta ótrúlegasta ævintýri mannkynssögunnar,“ sagði Isaacman.
Ítrekaði hann að hann og áhöfn hans hefðu farið lengra frá jörðinni en nokkur annar í rúma hálfa öld og sagðist sannfærður um að þessu nýja „geimöld“ væri rétt að byrja.
Commander @rookisaacman has egressed Dragon and is going through the first of three suit mobility tests that will test overall hand body control, vertical movement with Skywalker, and foot restraint pic.twitter.com/XATJQhLuIZ
— SpaceX (@SpaceX) September 12, 2024
„Í geimnum má finna fordæmalaus tækifæri til framþróunar í framleiðslu, líftækni, námuvinnslu og mögulega leiðir að nýjum orkugjöfum. Blómlegt geimhagkerfi er óhjákvæmilegt og það mun skapa tækifæri fyrir fjölda fólks til að búa og vinna í geimnum,“ sagði Isaacson, sem er 41 árs gamall.
Hann hét því að Bandaríkin myndu aldrei aftur missa getuna til að ferðast út í geim, eins og gerðist eftir að geimskutlurnar voru teknar úr notkun, og undir hans stjórn myndi NASA aldrei sætta sig við annað sæti.
„Við munum gefa börnum okkar innblástur til að líta upp og láta sig dreyma um hvað er mögulegt. Bandaríkjamenn munu ganga á tunglinu og Mars og í senn gera lífið betra hér á jörðinni.“
I am honored to receive President Trump’s@realDonaldTrump nomination to serve as the next Administrator of NASA. Having been fortunate to see our amazing planet from space, I am passionate about America leading the most incredible adventure in human history.
— Jared Isaacman (@rookisaacman) December 4, 2024
On my last…
Vilja iðnað í geimnum
Stórveldi heimsins vinna mörg hver að því að senda menn aftur til tunglsins og koma þar upp bækistöðvum og varanlegri viðveru. Í Bandaríkjunum kallast þetta verkefni Artemis-áætlunin. Hún snýr að því að nota tunglið sem stökkpall lengra út í sólkerfið.
Í grískri goðafræði er Artemis systir Apollo.
Til stendur að skjóta geimförum á braut um tunglið í september á næsta ári og ári eftir það eiga fyrstu geimfararnir að lenda á tunglinu frá árinu 1972, þegar geimfarar Apollo 17 sneru aftur til jarðar.
Þá urðu þeir Gene Cernan og Harrison Schmitt ellefti og tólfti maðurinn til að ganga á yfirborði tunglsins.
Sjá einnig: Fá 260 milljarða til að þróa tungljeppa
Til lengri tíma snýst þetta verkefni um að koma upp sjálfbærum iðnaði í geimnum, eins og Isaacman nefnir.
SpaceX, fyrirtæki Elons Musk, mun spila stóra rullu í Artemis-áætluninni. Fyrirtækið sér þegar um að senda farm og geimfara frá Bandaríkjunum til Alþjóðlegu geimstöðvarinnar. Þá eiga geimfarar að nota Starship-geimfar SpaceX til að lenda á tunglinu, þegar þar að kemur.
