Rétti Trump miða um að til­kynna sam­komu­lag um Gasa

Fréttin verður uppfærð.

Marco Rubio, utanríkisráðherra Bandaríkjanna, gekk inn á fund sem Donald Trump, forseti, sat með íhaldssömum áhrifavöldum og blaðamönnum í kvöld og rétti forsetanum miða. Á mynd sem ljósmyndari náði af miðanum sést að Rubio var að biðja Trump um að gefa grænt ljós á færslu um samkomulag varðandi Gasaströndina væri í höfn.

Það þyrfti Trump að gera svo hann gæti verið fyrstur til að tilkynna að samkomulag hafði náðst og það á Truth Social, hans eigin samfélagsmiðli. Á miðanum stóð að samkomulag væri „mjög nærri“.

Í kjölfarið svaraði Trump nokkrum spurningum frá blaðamönnum meðan Rubio stóð óþreyjufullur nærri, samkvæmt AP fréttaveitunni. Þegar Trump stóð upp sagði hann að samkomulag væri nærri en neitaði að fara nánar út í það.

„Ég þarf að fara núna, til að reyna að leysa vandamál í Mið-Austurlöndum,“ sagði hann.

Viðræður milli leiðtoga Hamas og Ísraela hafa farið fram í Egyptalandi undanfarna daga. Þeim er ætlað að binda enda á hernað Ísraela þar og sagði Trump fyrr í kvöld að hann myndi mögulega fara þangað um helgina.

Trump lagði á dögunum fram tillögur að mögulegu friðarsamkomulagi sem samþykktar hafa verið af Ísraelum og nokkrum ríkjum Mið-Austurlanda.

Sjá einnig: Hótar hel­víti á jörð sam­þykki Hamas ekki til­lögurnar

Ef marka má fjölmiðla ytra, meðal annars í Ísrael og palestínska miðla, er verið að leggja lokahönd á samkomulag sem skrifa á undir strax á morgun. 

Al Jazeera hefur eftir heimildarmanni sínum í Palestínu að leiðtogar Hamas hafi samþykkt að sleppa öllum gíslum sem eru í þeirra haldi, en ekki líkum sem þeir halda enn. Heimildarmaðurinn segir nokkurn árangur hafa náðst þegar kemur að skiptum á föngum og tryggingum um að Ísraelar hefji stríðið ekki aftur þegar gíslum hefur verið sleppt.

Gíslunum verður mögulega sleppt um helgina, samkvæmt heimildum blaðamanns Times of Israel.

Palestínskir miðlar hafa verið að birta myndir af sendinefnd Hamas taka í hendur erindreka frá Katar og Tyrklandi. Myndirnar munu hafa verið teknar í Egyptalandi í kvöld. Samkvæmt heimildum Reuters er leiðtogi Hamas á Gasaströndinni að funda með yfirmanni leyniþjónustu Egyptalands og eru þeir að reyna að setja punktinn yfir i-ið á samkomulaginu.

CNN hefur heimildir fyrir því að stutt sé í yfirlýsingu frá Trump og að viðræðunum hafi verið slitið í kvöld.

Frá því Rubio rétti Trump miðann hafa tvær færslur verið birtar á síðu hans á Truth Social, báðar myndbönd. Annað þeirra fjallar í einföldu máli sagt um að Demókratar séu ömurlegir. Hitt er um að ástandið í Chicago sé hræðilegt en Trump hefur verið að hóta því að senda hermenn þangað og hefur kallað eftir því að borgarstjóri Chicago og ríkisstjóri Illinois verði fangelsaðir.

Fréttin hefur verið uppfærð og verður uppfærð frekar.