Kristján vann Einvígið á Nesinu í annað sinn

Kristján Þór Einarsson vann Einvígið á Nesinu, árlegt góðgerðarmót Nesklúbbsins og DHL Express á Íslandi, sem fór fram á Nesvellinum í dag.

Þetta er í annað sinn sem Kristján vinnur Einvígið á Nesinu en hann afrekaði það einnig árið 2014.

Ellefu kylfingar tóku þátt að þessu sinni. Venju samkvæmt var leikinn níu holu höggleikur í morgun. Þar lék Björgvin Sigurbergsson best, eða á tveimur höggum undir pari vallarins.

Eftir hádegið hófst svo Einvígið sjálft þar sem einn keppandi datt út á hverri holu þangað til tveir börðumst um sigurinn á 9. holu.

Kristján og Guðmundur Rúnar Hallgrímsson stóðu síðastir eftir og hafði sá fyrrnefndi betur á endanum.

Að móti loknu var svo verðlaunaafhending og keppendum afhendur þakklætisvottur fyrir þátttökuna. Mótið var að venju góðgerðarmót og afhenti Auður Þórarinsdóttir frá DHL á Íslandi Guðjóni Jóhannssyni frá Vinaliðaliðaverkefninu eina milljón króna en verkefnið leggur áherslu á að stöðva einelti í skólum.

Lokastaðan í Einvíginu á Nesinu 2017:

1. Kristján Þór Einarsson, GM

2. Guðmundur Rúnar Hallgrímsson, GS

3. Birgir Björn Magnússon, GK

4. Björgvin Sigurbergsson, GK

5. Valdís Þóra Jónsdóttir, GL

6. Björgvin Þorsteinsson, GA

7. Ingvar Andri Magnússon, GR

8. Úlfar Jónsson, GKG

9. Oddur Óli Jónasson, NK

10. Ólafía Þórunn Kristinsdóttir, GR

11. Ragnhildur Kristinsdóttir, GR