ÍBV heppið að ná stigi

Kvennalið ÍBV, sem hafði fullt hús og 16 mörk út úr tveimur fyrstu leikjum sínum, tapaði sínum fyrstu stigum í gær og voru í raun heppnar að ná 1–1 jafntefli við KR í Vesturbænum. Hólmfríður Magnúsdóttir kom KR yfir eftir 10 mínútur úr einni af stórhættulegum skyndisóknum liðsins þar sem hún, Katrín Ómarsdóttir og Sif Atladóttir voru duglegar að stríða vörn ÍBV. Karen Burke jafnaði leikinn á 75. mínútu, markið kom eftir mikinn einleik og algjörlega gegn gangi leiksins. Eyjaliðið sótti stíft á lokamínútunum en náði ekki að skapa sér nein góð færi enda KR-vörnin mjög öflug í þessum leik.