Léttar veitingar í boði alla daga

Te & kaffi fagnar í dag 20 ára afmæli með opnun kaffihúss á Laugavegi 24, þar sem gamla hljómplötudeild Fálkans var til húsa. "Við opnum í dag með pompi og pragt," segir Berglind Guðbrandsdóttir, annar stofnenda fyritækisins, en það voru hún og Sigmundur Dýrfjörð sem opnuðu fyrsta íslenska expressobarinn í bakhúsi við Laugaveg árið1986. "Nú erum við eingöngu að flytja kaffihúsið, en búðin verður áfram á sama stað. Kaffihúsið var bara löngu sprungið," segir Berglind. "Við ætlum að opna klukkan hálf átta á morgnana og bjóða upp á fjölbreyttan morgunmat, léttan matseðil í hádeginu og hafa opið til níu á kvöldin svo fólk geti komið og fengið sér kvöldverð eftir vinnu. Þegar vel viðrar stillum við borðum út á stétt svo fólk geti setið úti og horft á mannlífið og þar getur fólk líka reykt því kaffihúsið er reyklaust." Fyrir utan opnun nýs kaffihúss eru ýmsar nýjungar á döfinni hjá Te & kaffi, eins og nýtt útlit og nýjar umbúðir á kaffi og tei, og svo stendur til að fara út í verslanirnar með vörur fyritækisins. "Þetta hefur gengið óskaplega vel frá upphafi," segir Berglind. "Okkur var strax vel tekið, en það verður að segjast eins og er að kaffi- og temenning var á frekar lágu plani hér þegar við byrjuðum. Það hefur breyst á undanförnum 20 árum og nú gera Íslendingar kröfur um gott hráefni og alvöru te og kaffi. Uppáhaldskaffið mitt ? Það er misjafnt frá degi til dags. Nú er það Panamakaffið en ég er alltaf að skipta," segir Berglind, sem tekur kaffið fram yfir teið