Brosandi bílar

Uppfinningamenn hjá bílaframleiðandanum Toyota hafa fengið einkaleyfi í Bandaríkjunum fyrir hugmynd að bíl sem sýnir tilfinningar. Hugmyndin er sú að með litabreytingum, ljósastillingum og öðru verði unnt að gefa tilfinningar ökumanna til kynna á ytra byrði bíla þeirra. Þannig geti bíllinn sýnst reiður þegar svínað er fyrir hann, undrandi þegar gengið er í veg fyrir hann og glaður þegar aðrir vegfarendur sýna tillitssemi. Í frétt New York Times í gær kom ekki fram hvenær áætlanir stæðu til að koma slíkum tilfinningabíl í framleiðslu en haft var eftir uppfinningamönnunum að hægt væri að beita svipuðum aðferðum til að sýna skapbrigði skipa, mótorhjóla og flugvéla.