Maraþon og músík

Allir geta verið með í Reykjavíkurmaraþoninu, þeir sem ekki vilja hlaupa ættu að drífa sig út og hvetja hlauparana áfram," segir Hjördís Guðmundsdóttir hjá Íþróttabandalagi Reykjavíkur sem sér um framkvæmd hlaupsins. "Þemað í ár verður músík og maraþon, við ætlum að leika tónlist undir skemmtiskokkinu en hvetjum líka þá sem ganga með trúbador í maganum að fara út á götu og leika tónlist fyrir þátttakendur." Eins og í fyrra er úr mörgum vegalengdum að velja, þriggja kílómetra skemmtiskokki, sjö kílómetrum, tíu kílómetrum, hálfmaraþoni sem er 21 kílómetri og maraþoni sem eru 42 kílómetrar. Tímataka er í öllum vegalengdum nema skemmtiskokki. Þegar hafa 1000 manns skráð sig en Hjördís vonast til að 4.000 manns taki þátt. "Íslendingar eru alltaf með seinni skipunum að skrá sig og skráningu lýkur ekki fyrr en á föstudag." Á föstudag verður pastaveisla fyrir þátttakendur í TBR-húsinu frá 18-21, þar geta þátttakendur einnig sótt bol og skráð sig frá hádegi. Reykjavíkurmaraþonið markar upphaf menningarnætur nú sem fyrr, hún verður sett um leið og skemmtiskokkið, kl. 11. Maraþonið sjálft hefst kl. 10.00. Skráning og frekari upplýsingar um hlaupið er að finna á heimasíðunni www.marathon.is.