Munaði sekúndum að allir færust

Yfirlögregluþjónninn á Sauðárkróki segir að aðeins hafi munað sekúndum að fjögur ungmenni færust öll í húsbrunanum þar í gærmorgun. Bænastund var haldin í Sauðárkrókskirkju nú síðdegis vegna slyssins en 21 árs gamall piltur lét lífið í eldsvoðanum. Fánar á Sauðárkróki blöktu í hálfa stöng í dag og margir höfðu kveikt á kertum. Klukkan hálffjögur streymdu bæjarbúar til bænastundar í kirkjunni vegna eldsvoðans, sem varð í íbúðarhúsi við Bárustíg í gærmorgun. Fjöldi ungmenna hafði verið í húsinu um nóttina í samkvæmi. Þegar eldurinn kom upp voru fjögur ungmenni þar enn, þrír piltar og ein stúlka, og þykir ganga kraftaverki næst að þrjú þeirra skyldu bjargast út. Björn Mikaelsson, yfirlögregluþjónn á Sauðárkróki, segir að aðeins hafi munað sekúndum að þau færust öll í brunanum. Einn piltur bjargaði sér með því að stökkva fram af svölum á annarri hæð. Þá var stúlku einnig bjargað af efri hæðinni. Björn segir að slökkviliðsmenn og nágrannar hafi unnið þrekvirki við bjarga hinum út. Nágrannar hafi gripið stúlku eftir að hafa manað hana til að stökkva út um glugga af annarri hæð. Þá þykir mildi að reykkafarar úr hópi slökkviliðsmanna skyldu ná að bjarga pilti út af neðri hæðinni. Þeir hnutu um eitthvað á gólfinu, sem í ljós kom að var pilturinn, og drógu hann umsvifalaust með sér út. Björn segir slökkviliðsmennina óyggjandi hafa bjargað lífi hans með því. Vegna brunans var því frestað í gær að tendra ljós á jólatrénu á Kirkjutorgi. Það var hins vegar gert nú síðdegis að bænastund lokinni.