Dómurinn fól í sér stefnubreytingu

"Jafnréttislögin hafa verið afgreidd frá Alþingi fjórum sinnum og alltaf er talað um að sömu laun eigi að fást fyrir jafnverðmæt og sambærileg störf en aldrei útskýrt nánar hvernig beri að skilja það orðalag," segir Ása. Tekur hún þó fram að við síðustu afgreiðslu laganna, árið 2000, hafi því verið bætt við að samanburðurinn gilti hjá sama atvinnurekanda. Hún telur greinilegt að boltanum sé varpað yfir til dómstóla og úrskurðarnefnda. Það sé á þeirra könnu að bera saman störfin. "Málin sem ég skoðaði skiptast í fjóra flokka," segir Ása. "Í fyrsta flokknum var um nákvæmlega sömu störf að ræða. Í öðrum flokknum voru staðgenglar settir á lægri laun en starfsmennirnir sem þeir voru að leysa af. Í þriðja flokknum voru tilfellin innan sömu stéttar þó um mismunandi störf væri að ræða en í fjórða flokki var farið út fyrir stéttina og störfin voru því ekki á sama sviði." Ása segir síðastnefnda flokkinn mest til umræðu núna. Í honum hafi fallið tveir hæstaréttardómar, einn héraðsdómur og fjögur álit kærunefndarinnar. Í öllum tilfellum hafi sönnunarbyrðinni verið varpað yfir á atvinnurekandann. "Það var sem sagt atvinnurekandinn sem varð að sýna fram á að störfin sem um ræddi væru ekki jafnverðmæt og sambærileg," útskýrir Ása. En telur hún að svona mál verði alltaf að fara dómstólaleið? "Þegar Jóhanna Sigurðardóttir mælti fyrir jafnréttislögunum á Alþingi 1991sem félagsmálaráðherra lýsti hún því yfir að reglugerð væri í smíðum þar sem ætti að skilgreina hvað væru jafnverðmæt og sambærileg störf. En þessi reglugerð var aldrei búin til. Menn hafa bara beðið eftir því að hvert mál fyrir sig dúkkaði upp. Þetta er því allt í mótun. En það varð stefnubreyting í Akureyrardómnum þegar störf innan ólíkra stétta voru borin saman hvað varðaði ábyrgð, inntak og ytri búnað."