Mikilvægur sigur hjá ÍR

ÍR-ingar unnu í dag mikilvægan sigur á KA-mönnum í DHL-deild karla í handbolta. Lokatölur urðu 35-32 eftir ÍR hafði leitt með fjórum mörkum í hálfleik, 19-15. Sigurinn var sanngjarn og fleytti ÍR-ingum upp fyrir KA og upp að hlið HK og Valsmanna á stigatöflunni með 12 stig. Haukar eru á toppnum með 13 stig, og leika þessa stundina gegn ÍBV. Markahæstir hjá ÍR voru þeir Hannes Jón Jónsson og Ragnar Helgason með 7 mörk hvor en Ingimundur Ingimundarsson skoraði 6. Ólafur Gíslason varði 13 skot í marki ÍR, þrátt fyrir að spila nær eingöngu í fyrri hálfleik. Hjá KA skoruðu þeir Halldór Sigfússon og Bjartur Máni Sigurðsson 7 mörk hvor og Ragnar Snær Njálsson 5. Þá tók Hafþór Einarsson 11 bolta í markinu.