Guðjón sterkur í Evrópukeppninni

Guðjón Valur Sigurðsson skoraði átta mörk þegar þýska liðið Essen sigraði Dynamo Astrachan frá Rússlandi með 31 marki gegn 23. Liðin mætast aftur um næstu helgi í Rússlandi. Gummersbach og Magdeburg eigast við í hinum undanúrslitaleiknum 6. og 9. apríl. Í Evrópukeppni félagsliða sigraði spænska liðið Ademar Leon bosníska liðið Izvidac Ljubuski 37-30 í fyrri leik liðanna á Spáni. Vardar Skopje Makedóníu og króatíska liðið Zagreb keppa í dag. Ólafur Stefánsson og félagar hans í Ciudad Real leika fyrri leikinn í undanúrslitum meistaradeildarinnar í dag gegn franska liðinu Montpellier. Leikurinn verður sýndur beint á Sýn klukkan 14.30. Celje Piovorna Lasko vann Barcelona með þriggja marka mun, 34-31, í fyrri undanúrslitaleik liðanna í Slóveníu í gær.