Haukar stóru skrefi á undan

Það fór eins og flesta grunaði sem á annað borð fylgjast eitthvað með handbolta - Haukar unnu sigur á FH í fyrri eða fyrsta leik liðanna í átta liða úrslitunum sem fram fór að Ásvöllum. Það sem hins vegar kom á óvart var hversu and- og baráttulaust FH-liðið var og greinilegt strax frá byrjun að leikmenn þess voru engan veginn tilbúnir í þennan slag. Haukarnir þurftu engan stórleik til þess að ná þægilegu forskoti sem þeir héldu síðan áreynslulaust og bættu reyndar nokkuð við það þegar á leið. Lokatölur urðu 29-22 eftir að staðan hafði verið 15-11 í hálfleik. Það má til sanns vegar færa að fjögurra marka forskot í hálfleik teljist nú ekki mikið í nútímahandknattleik en það var samt sem áður aldrei neitt sem benti til þess að FH-ingar ættu nokkurn möguleika á að snúa leiknum sér í vil - það lá bara í loftinu og það skynjuðu allir sem sáu og spiluðu þennan leik. Enginn einn leikmaður skaraði fram úr í jöfnu liði Hauka en burðarásarnir, Ásgeir Örn, Andri og Birkir, voru afar traustir. Þótt liðið hafi ekki sýnt neinn glansleik - þess þurfti einfaldlega ekki - er greinilegt að mikið sjálfstraust er í herbúðum þess og það verður ekki séð í fljótu bragði að eitthvað lið komi til með að velta þeim af stalli sem besta handboltaliði landsins. Í það minnsta myndi ég ekki setja pening á að hið fornfræga veldi, FH, eigi mikinn möguleika á því. Mjög mikið þarf að breytast hjá liðinu fyrir leikinn í Kaplakrika á fimmtudagskvöld - eiginlega svo mikið að teljast verður nánast kraftaverk að þeir svart/hvítu nái að snúa blaðinu við á þessum stutta tíma. Maður skyldi þó aldrei útiloka neitt. Það hefur alltaf verið baráttugleði og læti í kringum Árna Stefánsson, þjálfara FH-inga, en það sem liðið sýndi að Ásvöllum í kvöld minnti ekki neitt á hvorutveggja. Vísir náði tali af Andra Stefan, leikmanni Hauka, rétt eftir leik. Þetta hafði hann að segja: "Við vorum tilbúnir en þeir ekki. Mér fannst samt við eiga nóg inni þegar upp var staðið og við vorum betri á öllum sviðum. Vörnin hjá þeim var hriplek og þeir sýndu miklu minni baráttu en venjulega. Leikir þessara liða hafa alltaf verið rosalegir baráttu- og slagsmálaleikir en svo var ekki að þessu sinni. Við förum galvaskir í leikinn í Kaplakrika, ætlum að klára hann, og ætlum okkur reyndar einfaldlega að fara alla leið," sagði galvaskur Andri Stefan. Mörk Hauka: Jón Karl Björnsson 7/6 (10/6), Ásgeir Örn Hallgrímsson 6 (13), Andri Stefan 4 (7), Þórir Ólafsson 3/1 (6/1), Halldór Ingólfsson 3 (5), Vignir Svavarsson 2 (2), Matthías Árni Ingimarsson 2 (2), Gunnar Ingi Jóhannsson 2 (3), Gísli Jón Þórisson 1 (3) Varin skot: Birkir Ívar Guðmundsson 17 (39/1) Mörk FH: Jón Helgi Jónsson 5/1 (7/1), Hjörtur Hinriksson 4 (5), Valur Arnarson 3 (8), Hjörleifur Þórðarson 2 (2), Guðmundur Pedersen 2 (3), Brynjar Geirsson 2 (5), Heiðar Arnarson 2 (6), Arnar Pétursson 1 (6) Varin skot: Elvar Guðmundson 6 (21/4), Magnús Sigmundsson 7 (21/3)