Sigfús jafnaði í lokin gegn Svíum

Ísland náði dramatísku jafntefli gegn Svíum í síðari vináttuleik þjóðanna í handbolta á Akureyri í kvöld, 31-31. Sigfús Sigurðsson náði að jafna þegar 4 sekúndur voru til leiksloka. Ísland leiddi í hálfleik 16-12 en Svíar náðu yfirhöndinni í síðari hálfleik og komust yfir. Róbert Gunnarsson var markahæstur Íslands með 8 mörk. Ísland vann fyrri leikinn í Kaplakrika á mánudaginn 36-32 en það var fyrsti sigur Íslands á Svíum í handbolta í 18 ár. Það er því að sjá að bilið á milli liðanna sé að minnka. Ísland leikur gegn Hvít-Rússum um helgina fyrri leikinn um laust sæti á Evrópumótinu og voru leikirnir gegn Svíum lokaundirbúningurinn fyrir þá baráttu.