Miðja vegu milli kanínu og lambs

Jóhanna B. Þorvaldsdóttir, hjúkrunarfræðingur og bóndi, tekur þátt í tilraunaverkefni með vinnslu á afurðum úr sauða- og geitamjólk. Geitaostur sem er sambærilegur hinum gríska fetaosti var unninn í Mjólkursamlaginu í Búðardal úr geitunum hennar og verður í kynningarsölu á meðan birgðir endast.

„Ég er sú eina sem hefur verið að mjólka geiturnar mínar hérlendis, en ég er með 34 geitur og fæ þannig um 30 lítra á dag,“ segir Jóhanna. Hún segir geitamjólkina auðmeltari en kúamjólkina, hún henti sérstaklega vel fólki og börnum með óþol og sé góð við sýkingum.

„Miklar rannsóknir hafa verið unnar í Noregi og víðar á geitamjólkinni sem heilsufæði og nú hefur verið sett af stað rannsóknarverkefni sem miðar að því að kortleggja prótein í íslenskri geitamjólk,“ segir Jóhanna, sem hefur mikla trú á geitamjólkinni og metur næringareiginleika hennar mikils.

„Sjálf bý ég til jógúrt úr mjólkinni og barnabarnið mitt lifir alfarið á geitamjólkinni,“ segir Jóhanna. Í geitamjólkinni eru smærri prótein, sem fara betur í meltingarveg barna, sérstaklega þeirra sem þola ekki kúamjólk og jafnvel ekki sojamjólk heldur.

„Kiðlingakjötið nota ég einnig mjög mikið en það er mjög gott. Það er alveg fitulaust og er miðja vegu milli kanínu og lambs, en kjötið er mun ljósara en á lambi,„ segir Jóhanna. Hún segist vera mjög spennt að taka þátt í verkefninu, enda hafi hún lagt hjarta sitt og sál í vinnuna með geitunum. „Það er virkilega gaman að sjá árangur af vinnu sinni. Draumurinn er svo náttúrlega að búa sjálf til ostinn á búinu og selja hann ásamt mjólkinni beint þaðan,“ segir Jóhanna og bætir því við að íslenska geitamjólkin sé sætari og mildari en kúamjólkin og köld og ný sé hún ekki ósvipuð léttmjólk. „Mér finnst vanta að brúni geitaosturinn sé búinn til hérna, hann er svo góður.

Geitaostarnir verða til sölu í Mjólkurbúðinni í Búðardal, Ostabúðinni á Bitruhálsi, Ostabúðinni á Skólavörðustíg og Ostahúsinu í Hafnarfirði.