Kimi er sá fljótasti

Fyrrum heimsmeistarinn  í Formúlu eitt kappakstri, Jackie Stewart, segir að Kimi Raikkönen hafi tekið við af Michael Schumacher sem fljótasti ökumaðurinn í íþróttinni í dag, en hrósar þó liði Renault fyrir gott gengi í keppnum ársins. "Þrátt fyrir að staðan í keppni ökumanna sýni það ekki, er Kimi Raikkönen yfirburða- ökumaður í Formúlu eitt í dag. Kimi hefur verið óheppinn með bílinn sinn á tímabilinu, því ef hann hefði ekki verið svona gjarn á að bila, er ég viss um að hann hefði orðið heimsmeistari. Ég vil þó ekki taka neitt af Fernando Alonso og Renault, þeir hafa átt mjög gott tímabil og eiga skilið að sigra í ár," sagði Stewart.